Enches o formulario
Faino coa axuda dun dos teus titores legais. Pediremos só a información necesaria para organizar o programa.
Programa de amadriñamento matemático
Matemáticas entre matemáticas
Aurias é un proxecto iniciado dende o Grao de Matemáticas da Universidade de Santiago de Compostela para achegar as matemáticas a rapazas de 13 a 17 anos. A través de sesións quincenais con madriñas, queremos axudar ás participantes a descubrir o seu potencial matemático e animalas a participar en actividades como as Olimpíadas de Matemáticas, sen importar o seu nivel ou experiencia previa.
Aurias nace para acompañar un cambio que empeza a verse.
Participación feminina
+5,4 puntos
Na Olimpíada de Bacharelato pasou do 28% en 2025 ao 33,4% en 2026.
En colaboración con Sementeira
Clube Olímpico de Mates-USC
Comezamos a colaborar con Sementeira para achegar preparación, problemas e referentes.
Que é isto?
Un espazo para achegarse ás matemáticas sen présa nin presión.
Aurias nace en 2025 ante a preocupación pola baixa participación feminina en actividades matemáticas competitivas, como as Olimpíadas de Matemáticas, en contraste coa presenza equilibrada de mulleres nos graos de Matemáticas. O programa busca reducir a distancia entre estes dous mundos creando un ambiente de apoio e inspiración, onde as rapazas poidan explorar o seu interese polas matemáticas fóra da clase, desenvolver habilidades de resolución de problemas e conectar con outras mulleres que compartan a súa paixón.
Non fai falta sabelo todo nin ter claro se queres estudar Matemáticas. Chega con ter curiosidade, un chisco de tempo para pensar con calma e ganas de desfrutar resolvendo problemas dende novas perspectivas.
O noso obxectivo é que ningunha rapaza abandone as matemáticas por pensar que “isto non é para min”.
Como funciona?
Catro pasos, sen misterio.
Buscámosche unha madriña
Asignarémosche unha estudante universitaria segundo dispoñibilidade, horarios e intereses.
Poñédesvos de acordo
A túa madriña escríbete para concretar o día e hora das sesións. Todo é en liña.
Comezades
Nas sesións podedes resolver problemas, preparar olimpíadas ou falar de como é estudar Matemáticas.
Para non perder a praza, revisa o correo e responde nun prazo máximo dunha semana.
Para calquera dúbida: auriasmat@gmail.com.
Para ti
Podes apuntarte aínda que...
- nunca participases nunha olimpíada;
- che gusten as matemáticas pero che dean algo de respecto;
- nunca participaras nunha actividade extracurricular de matemáticas;
- non saibas que queres estudar de cara ao futuro.
Que atoparás
Unha persoa de referencia.
As madriñas son estudantes de Matemáticas, Dobre Grao Matemáticas-Enxeñería Informática ou Dobre Grao Física-Matemáticas. Non están para examinarte nin para mandar deberes: están para proporche problemas, ensinarte novos conceptos e ideas, e sobre todo para axudarte e responder ás túas dúbidas. Podes falar con elas de como é a universidade, de que se pode facer con Matemáticas ou de calquera cousa que teñas en mente.
Apoios
Quen fai posible Aurias?
O programa medra grazas ao traballo voluntario das madriñas e á colaboración da Oficina de Igualdade de Xénero da Universidade de Santiago de Compostela.
Únete
Tes ganas de probar?
Apúntate e escribiranche desde Aurias para continuar o proceso.
Quero participar